ពត៌មានកីឡាថ្មីៗ

ចាន់ វឌ្ឍនាកា វិលត្រលប់ចូលហ្វឹកហាត់លើទីលានសារជាថ្មី ក្រោយសម្រាកព្យាបាលរបួសសរសៃជង្គង់៨ខែ

ខ្សែប្រយុទ្ធឆ្នើមរបស់ក្លិបបាល់ទាត់បឹងកេត និងក្រុមជម្រើសជាតិកម្ពុជា កីឡាករ ចាន់ វឌ្ឍនាកា វិលត្រលប់ចូលហ្វឹកហាត់លើទីលានឡើងវិញ ក្រោយសម្រាកព្យាបាលរបួសសរសៃពួរជង្គង់ (ACL) អស់រយៈពេល៨ខែ។ យោងតាមការបញ្ជាក់របស់កីឡាករ ចាន់ វឌ្ឍនាកា លើគណនីផេកហ្វេសបុកផ្លូវការថា៖«ខ្ញុំដួលនៅទីនេះ ខ្ញុំត្រូវតែចាប់ផ្ដើមនៅកន្លែងនេះ ៨ខែកន្លងផុតទៅក្រោយការវះកាត់សសៃពួរជង្គង់ ចាប់ផ្ដើមថ្ងៃទី១វាប្រាកដណាស់នឹងជួបរឿងពិបាកជាច្រើន តែអ្វីដែលត្រូវធ្វើមានតែការខំប្រឹង ប្ដេជ្ញា វាពេលវេលាមួយដែលខ្ញុំទន្ទឹងរងចាំអស់រយៈពេលយូមកហើយ អរគុណគ្រប់គ្នាដែលបារម្ភ នឹងសួសុខទុក្ខ ពេលនេះខ្ញុំបានត្រលប់មកចូលទីលានហ្វឹកហាត់ជាមួយក្រុមវិញហើយ តែយ៉ាងណាក៏ត្រូវការពេលវេលាបន្ថែមទៀត ដើម្បីអោយឆាប់បានជួយក្រុមក្នុងការប្រកួត»។ កីឡាកររបស់ក្លិបបឹងកេតរូបនេះ បានរងរបួសនៅក្នុងជំនួបជាមួយ ក្លិបវិសាខា ក្នុងពានរង្វាន់ត្រៀមមុនបើករដូវកាល (Pre-season Cup) កាលពីថ្ងៃទី២៦ ខែមករា ឆ្នាំ២០២២ នៅកីឡដ្ឋានព្រីនស៍ ហើយតម្រូវឲ្យមានការវះកាត់ និងសម្រាករយៈពេលយូរពី ៦ខែ ទៅ ៨ខែ។ របួសនេះធ្វើឲ្យខ្សែប្រយុទ្ធវ័យ២៨ឆ្នាំរូបនេះ អវត្តមានពីពានរង្វាន់សំខាន់ៗជាច្រើនក្នុងឆ្នាំ២០២២ គឺ អាចមួយរដូវកាលពេញ នៃពានខេមបូឌានព្រីមៀរលីគ ក៏ដូចជាពានសម្តេចតេជោ ហ៊ុន សែន, ពានក្រៅស្រុកមានដូចជា វគ្គជម្រុះជុំទី៣ ជើងឯកអាស៊ី (AFC Asian Cup 2023), និងពានរង្វាន់ជើងឯកអាស៊ីអាគ្នេយ៍ (AFF Suzuki Cup 2022) ជាដើម។ បែបនេះក្ដី នៅឆ្នាំ២០២៣ អាចចាត់ទុកថាជាឆ្នាំនៃការវិលត្រលប់ជាមួយនិងភាពខ្លាំងជាងមុន ប្រសិនបើការព្យាបាលជាសះស្បើយ ១០០ភាគរយ។ គាប់ជួនជាមួយពេលវេលានៃព្រឹត្តិការណ៍កីឡាស៊ីហ្គេម ឆ្នាំ២០២៣ ដែលកម្ពុជា ធ្វើជាម្ចាស់ផ្ទះផងដែរនោះ កីឡាករវ័យ ២៨ឆ្នាំរូបនេះ រំពឹងយកការឈឺចាប់ពីរបួសរយៈពេលយូរកែប្រែប្រវត្តិសាស្តបាល់ទាត់កម្ពុជានៅស៊ីហ្គេម ប្រសិនបើអាចក្លាយជាផ្នែកមួយនៃក្រុម U23 កម្ពុជា ក្នុងនាមជាកីឡាករលើសអាយុ ២៣ឆ្នាំ៕ ...

អ៊ីរ៉ង់ ប៉ះ វៀតណាម ខណ:ថៃ ប៉ះ តាជីគីស្ថាន វគ្គ៨ក្រុមចុងក្រោយ AFC Futsal Asian Cup

អ៊ីរ៉ង់ ប៉ះ វៀតណាម ខណ:ថៃ ប៉ះ តាជីគីស្ថាន វគ្គ៨ក្រុមចុងក្រោយ AFC Futsal Asian Cup

ពានរង្វាន់បាល់ទាត់ហ្វូតសាលជើងឯកប្រចាំទ្វីបអាស៊ី 2022 AFC Futsal Asian Cup ដែលរៀបចំចាប់ពីថ្ងៃទី២៧ ខែកញ្ញា ឆ្នាំ២០២២ ដល់ថ្ងៃទី៨ ខែតុលា ឆ្នាំ២០២២ នៅប្រទេសគុយវែត ពេលនេះរកឃើញជើងខ្លាំងឡើងដល់វគ្គ៨ក្រុមចុងក្រោយ។ ជើងខ្លាំងឡើងដល់វគ្គ៨ក្រុមចុងក្រោយបានមកពី៖– ពូល A គុយវ៉ែត, ថៃ– ពូល B អ៊ូបេគីស្ថាន, តាជីគីស្ថាន– ពូល C អ៊ីរ៉ង់, ឥណ្ឌូណេស៊ី– ពូល D ជប៉ុន, វៀតណាម។ វគ្គ៨ក្រុមចុងក្រោយនឹងត្រូវប្រកួតនៅថ្ងៃទី៤ ខែតុលា តាមកម្មវិធីប្រកួតដូចខាងក្រោម៖-អ៊ីរ៉ង់ ប៉ះ វៀតណាម ម៉ោង៣រសៀល-ជប៉ុន ប៉ះ ឥណ្ឌូណេស៊ី ម៉ោង៤ល្ងាច-ថៃ ប៉ះ តាជីគីស្ថាន ម៉ោង៥ល្ងាច-អ៊ូបេគីស្ថាន ប៉ះ គុយវ៉ែត ម៉ោង៦ល្ងាច។ ពានរង្វាន់ AFC Futsal Cup នេះរៀបចំឡើងតាំងពីឆ្នាំ១៩៩៩ មកដោយដំបូងរៀបចំរាល់១ឆ្នាំម្តង តែក្រោយមកប្តូរជារៀបចំរាល់២ឆ្នាំម្តងវិញ ខណៈក្រុមអ៊ីរ៉ង់ ឈ្នះជើងឯកច្រើនជាងគេ រហូតដល់១២លើក ហើយជប៉ុនឈ្នះបាន៣លើក៕ ...

Ronaldo ចង់ចេញពី Man Utd នៅខែមករាខាងមុខ

Ronaldo ចង់ចេញពី Man Utd នៅខែមករាខាងមុខ

Cristiano Ronaldo ត្រូវបានរាយការណ៍ថាចង់ចាកចេញពី Manchester United ក្នុងខែមករាខាងមុខ ខណៈលោក Erik ten Hag ក៏បើកផ្លូវដូចគ្នា។កីឡាករសញ្ជាតិព័រទុយហ្គាល់ត្រូវបានឲ្យអង្គុយកៅអីបម្រុងក្នុងការប្រកួតកាលពីថ្ងៃអាទិត្យ United ចាញ់ Manchester City ៦-៣។ លោក Ten Hag បានបញ្ជាក់ថា ការមិនដាក់ឲ្យ Ronaldo ចូលលេងក៏ព្រោះតែការគោរពសម្រាប់អាជីពដ៏ធំរបស់គេ។ប្រភពពីសារព័ត៌មាន Telegraph ឲ្យដឹងថា Ronaldo ចង់ចាកចេញពីបិសាចក្រហមនៅខែមករា ក្រោយបរាជ័យចង់ចេញកាលពីរដូវក្ដៅកន្លងទៅ។ លោក Ten Hag កន្លងទៅបានឃាត់មិនចង់ឲ្យកីឡាករវ័យ៣៧ឆ្នាំចេញឡើយ ប៉ុន្តែពេលនេះលោកក៏បានបើកចិត្តឲ្យកីឡាកររកក្លិបថ្មី ប្រសិនបើទទួលបានសំណើសមរម្យណាមួយមកដល់។ចាប់តាំងពីចាប់ផ្ដើមរដូវកាលថ្មី២០២២-២៣ Ronaldo ភាគច្រើនអង្គុយជាកីឡាករបម្រុង និងប្ដូរចូលក្នុងវគ្គទីពីរ។ ម្ចាស់ពាន Ballon d’Or ៥សម័យបានជាប់ជម្រើសដំបូងរបស់ក្រុមបានម្ដងគត់ ពេលដល់ United ចាញ់ Brentford ៤-០៕ ...

ច្បាស់ហើយ! ចប់រដូវកាលនេះ Higuain នឹងព្យួរស្បែកជើងពីបាល់ទាត់

ច្បាស់ហើយ! ចប់រដូវកាលនេះ Higuain នឹងព្យួរស្បែកជើងពីបាល់ទាត់

ខ្សែប្រយុទ្ធ Gonzalo Higuain នឹងព្យួរស្បែកជើងពីបាល់ទាត់នៅចុងបញ្ចប់នៃយុទ្ធនាការ Major League Soccer ឆ្នាំ២០២២របស់ក្លិប Inter Miami។និយាយដោយអារម្មណ៍ក្តុកក្តួលក្នុងសន្និសីទកាសែត កីឡាករសញ្ជាតិអាហ្សង់ទីនបានបញ្ជាក់ថា ពេលវេលាត្រូវលាពីបាល់ទាត់បានមកដល់។ គេនឹងយករឿងល្អៗទាំងឡាយដែលបានកើតឡើងដាក់ក្នុងខួរក្បាលនិងបេះដូង។ ហើយគេក៏សូមអរគុណដល់គ្រូបច្ចេកទេសទាំងអស់ដែលបានបង្រៀនរូបគេដូចជានៅក្នុងក្លិប Palermo, River Plate, Real Madrid, អាហ្សង់ទីន, Napoli, Milan, Chelsea និង Inter Miami។កីឡាករវ័យ៣៤ឆ្នាំធ្លាប់លេងឲ្យក្លិបធំៗនៅអឺរ៉ុប Real Madrid, Napoli និង Juventus ហើយធ្លាប់ខ្ចីជើងទៅលេងនៅ Chelsea និង AC Milan មួយរយៈខ្លី។ ចុងក្រោយគេបានផ្លាស់មកកាន់ក្លិប Inter Miami ក្នុងឆ្នាំ២០២០ ហើយសង្ឃឹមនឹងអាចជួយក្រុមឈានដល់វគ្គ Play-offs ក្របខណ្ឌ MLS សម្រាប់រដូវកាលចុងក្រោយរបស់ខ្លួន។ក្នុងអាជីពបាល់ទាត់លេងជាមួយក្លិបទាំងអស់ Higuain រកបាន៣៣៣គ្រាប់ និងបញ្ជូនឲ្យគេទាត់ចូលបាន១១៣គ្រាប់ក្នុងការបង្ហាញខ្លួន៧០៧ប្រកួត។ ក្នុងនោះ១២១ធ្វើបានជាមួយ Real Madrid៕ ...

ខ្សែប្រយុទ្ធ កែវ ឧត្តម ស៊ុតបញ្ចូលទី, ទទួលកាតលឿង និងឈ្នះ MOTM ជាលើកដំបូងក្នុង១ប្រកួត

កីឡាករ កែវ ឧត្តម ខ្សែប្រយុទ្ធវ័យក្មេងរបស់ក្លិបបាល់ទាត់ណាហ្គាវើលដ៍ ចាយពេលត្រឹមតែ៧៨នាទីប៉ុណ្ណោះ ដើម្បីស៊ុតបញ្ចូលទីគ្រាប់ដំបូង នៅលីគកំពូលកម្ពុជារដូវកាល ២០២២ ព្រមទាំងទទួលបានកាតលឿង ជាលើកដំបូងក្នុងជំនួបម្ចាស់ផ្ទះ ណាហ្គាវើលដ៍ យកឈ្នះ គិរីវង់សុខសែនជ័យ ក្នុងលទ្ធផល ២-០ នៅលីគកំពូលកម្ពុជា សប្តាហ៍ទី១៨ នៅកីឡដ្ឋានខេត្តកំពង់ស្ពឺ។ ក្រោយចប់ការប្រកួតខ្សែប្រយុទ្ធ កែវ ឧត្តម ជាប់ជាកីឡាករល្អប្រចាំការប្រកួត Man of the Match ជាលើកដំបូងនៅលីគកំពូលកម្ពុជា ក្រោមក្រសែលភ្នែកអ្នកគាំទ្រ ២០០០នាក់គត់។ គួរដឹងថា កែវ ឧត្តម គឺជាអតីតកីឡាកររបស់ក្លិបបាល់ទាត់ ស៊ីម៉ាក់ និង វេស្ទើនភ្នំពេញ មុនផ្លាស់មកកាន់ណាហ្គាវើលដ៍ នៅឆ្នាំ ២០១៩ ខណ:រូបគេក៏ធ្លាប់ជាប់ឈុត U19 ក្រុមជម្រើសជាតិកម្ពុជាផងដែរ។ កែវ ឧត្តម ក៏ត្រូវជាកូនប្រុសរបស់លោក កែវ សារិន ដែលធ្លាប់ធ្វើជាគ្រូជំនួយ និងគ្រូបង្គោលក្លិបបាល់ទាត់ស៊ីម៉ាក់យូណាយធីត ចន្លោះឆ្នាំ ២០០៧-១៨ ដែលទទួលមរណភាពនៅឆ្នាំ២០២០ ដោយរោគាពាធ៕ ...

ក្រោយប្រទេសហ្គីណេត្រូវបានដកចេញ ពេលនេះម៉ារ៉ុកចេញ មុខដេញថ្លៃធ្វើម្ចាស់ផ្ទះ Africa Cup of Nations 2025

សហព័ន្ធកីឡាបាល់ទាត់ទ្វីបអាហ្រ្វិកនឹងបើកការដេញថ្លៃឡើងវិញសម្រាប់ធ្វើម្ចាស់ផ្ទះការប្រកួតពានរង្វាន់ទ្វីបអាហ្វ្រិកឆ្នាំ២០២៥ បន្ទាប់ពីបានដកហូតសិទ្ធិធ្វើជាម្ចាស់ផ្ទះនៃការប្រកួតនេះដោយប្រទេសហ្គីណេ។ ក្នុងនោះប្រទេសម៉ារ៉ុក ដែលជាម្ចាស់ផ្ទះនៃការប្រកួតបាល់ទាត់ ទ្វីបអាហ្វ្រិក Women’s Africa Cup of Nations វគ្គផ្តាច់ព្រ័ត្រក្នុងខែកក្កដា មានបានដាក់ពាក្យធ្វើជា ម្ចាស់ផ្ទះ Africa Cup of Nations 2025។ ប្រធានសហព័ន្ធកីឡាបាល់ទាត់ទ្វីបអាហ្រ្វិក ហៅកាត់ថា CAF លោក Patrice Motsepe ស្ថិតនៅក្នុងរដ្ឋធានី Conakry ប្រទេសហ្គីណេបានប្រកាសថា ការប្រកួតដែលមានក្រុមចំនួន២៤ នឹងត្រូវដកចេញ ដោយសារតែខ្វះហេដ្ឋារចនាសម្ព័ន្ធ និងសម្ភារៈបរិក្ខារដែលសមស្រប។ លោក Motsepe បាននិយាយនៅក្នុងសន្និសីទសារព័ត៌មានបន្ទាប់ពីបានជួបជាមួយថ្នាក់ដឹកនាំនៃរដ្ឋាភិបាលរបស់ប្រទេសហ្គីណេថា៖«ពានរង្វាន់ Nations Cup ឆ្នាំ២០២៥ ដែលបានបែងចែកទៅប្រទេសហ្គីណេ នឹងមិនប្រព្រឹត្តទៅនៅទីនោះទេ ពីព្រោះយើងមិនទាន់រួចរាល់ នៅក្នុងប្រទេសហ្គីណេ»។ បច្ចុប្បន្នស្ថានភាពនយោបាយនៅក្នុងប្រទេសហ្គីណេ ដែលស្ថិតនៅក្រោម ការគ្រប់គ្រងរបស់យោធាចាប់តាំងពីរដ្ឋប្រហារកាលពីឆ្នាំមុន បាននាំឱ្យមាន ការព្រួយបារម្ភអំពីសន្តិសុខ និងការរៀបចំសម្រាប់ការធ្វើជាម្ចាស់ផ្ទះ ការប្រកួត Nations Cup៕ ...

លោក មាស សំអឿន ក្លាយជាគ្រូ U18 របស់ក្លិបបាល់ទាត់ ISI ដង្កោសែនជ័យ ក្រោយចាកចេញពីអគ្គិសនី

នៅរសៀលថ្ងៃទី៣ ខែតុលា ឆ្នាំ២០២២ ក្លិបបាល់ទាត់ អាយ អេស អាយដង្កោសែនជ័យ បានប្រកាសតែងតាំង លោក មាស សំអឿន ជាគ្រូយុវជនអាយុក្រោម១៨ឆ្នាំ ជំនួសកន្លែងលោក សំ ចន្នា ដែលទើបចាកចេញ។ លោក មាស សំអឿន គឺជាអតីតទីប្រឹក្សាបច្ចេកទេស របស់ក្លិបបាល់ទាត់អគ្គិសនីកម្ពុជា កាលពីឆ្នាំ ២០១៩ និងជាគ្រូបង្គោល ២០២០-២១ ដោយបានរួមចំណែកដ៏ធំធេង ក្នុងការបណ្តុះបណ្តាលធនធានកីឡាករ និងរៀបចំគម្រោងរបស់ក្លិប មុនពេលចាកចេញពីក្លិបបាល់ទាត់អគ្គីសនីកម្ពុជា នៅថ្ងៃទី២៣ ខែវិច្ឆិកា ឆ្នាំ២០២១ ឆ្នាំ២០២១។ គួរដឹងថាលោក មាស សំអឿន ក្រៅពីជាគ្រូបង្គោលរបស់ក្លិបបាល់ទាត់ អគ្គិសនីកម្ពុជា ហើយលោកក៏ធ្លាប់ដឹងនាំក្រុមបៀលប្រាយយូណាយធីត និងវេស្ទើនភ្នំពេញ ព្រមទាំងជាគ្រូជំនួយ U15 ក្រុមជម្រើសជាតិកម្ពុជា ផងដែរ៕ ...

Hun Sen Cup៖ត្រួសៗជុំវិញ ភ្នំពេញក្រោន ទល់នឹង វិសាខា វគ្គពាក់កណ្តាលផ្តាច់ព្រ័ត្រ

Ten Hag បញ្ជាក់ច្បាស់ៗថា ដោយសារការគោរពទើបមិនដាក់ Ronaldo ឲ្យលេងជាមួយ City

Ten Hag បញ្ជាក់ច្បាស់ៗថា ដោយសារការគោរពទើបមិនដាក់ Ronaldo ឲ្យលេងជាមួយ City

Manchester City បានលត់ Manchester United យ៉ាងចាស់ដៃលទ្ធផល ៦-៣ នៅក្នុងក្របខណ្ឌ Premier League ខណៈប្រកួតនេះគ្មានវត្តមាន Cristiano Ronaldo ឡើយ។ការប្រកួតដែលគេឲ្យឈ្មោះថា Manchester Derby ៦គ្រាប់របស់ City ធ្វើបានដោយកីឡាករតែ២រូបគត់គឺខ្សែប្រយុទ្ធ Erling Haaland និង Phil Foden រកបានម្នាក់៣គ្រាប់។ Antony Santos ធ្វើបានមួយគ្រាប់ និង Anthony Martial រកបាន២គ្រាប់ម្នាក់ឯង ជួយ United តាមបាន៣គ្រាប់មកវិញ។ ការប្រកួតដ៏សំខាន់នេះ អ្នកចាត់ការរបស់បិសាចក្រហម Erik ten Hag បានដាក់ Ronaldo ឲ្យអង្គុយកៅអីបម្រុង និងមិនបានប្ដូរឲ្យចូលលេងឡើយ ត្បិតមានការដូរកីឡាករ៥រូបអំឡុងពេលប្រកួត។ ហេតុផលដែលអ្នកចាត់ការសញ្ជាតិហុល្លង់មិនដាក់ឲ្យកីឡាករសញ្ជាតិព័រទុយហ្គាល់ចូលលេង ព្រោះចង់បង្ហាញការគោរព។ក្រោយបញ្ចប់ការប្រកួត Tan Hag បានបញ្ជាក់ថា លោកមិនចង់ឲ្យមានការប្រមាថដល់ Ronaldo ដោយឲ្យគេចូលលេងក្នុងពេលដែល United ត្រូវ City នាំមុខ ៤-០ ទៅហើយនោះ។ City បច្ចុប្បន្នស្ថិតនៅលេខ២ក្នុងតារាងពិន្ទុ ខណៈ United នៅលេខ៧៕ ...

Real ខាតពិន្ទុជាលើកដំបូងក្នុង La Liga ដោយសារតែ Osasuna

Real ខាតពិន្ទុជាលើកដំបូងក្នុង La Liga ដោយសារតែ Osasuna

Karim Benzema ខកខានប៉េណាល់ទីមិនចូល ធ្វើឲ្យ Real Madrid ខាតពិន្ទុជាលើកដំបូងក្នុងលីគនារដូវកាលនេះ ពេលលេងជាមួយក្រុម Osasuna កាលពីយប់មិញ។កាលប្រកួតដែលរៀបចំនៅកីឡដ្ឋាន Bernabeu តារាកំពុងរះ Vinicius Junior រកបានគ្រាប់នាំមុខឲ្យ Madrid នាទីទី៤២។ ប៉ុន្តែឈានដល់វគ្គទីពីរនាទីទី៥០ ខ្សែប្រយុទ្ធ Kike Garcia ធ្វើបានគ្រាប់តាមស្មើវិញឲ្យ Osasuna តាមរយៈការតែតបញ្ចូលទីយ៉ាងល្អ។នាទី៧៨ កីឡាករ David Garcia របស់ Osasuna ទទួលបានកាតក្រហមត្រូវបណ្ដេញចេញពីទីលាន ក្រោយបង្កកំហុសលើ Benzema និងបង្កើតឲ្យមានបាល់ប៉េណាល់ទី។ យ៉ាងណាមិញ សំណាងមិនល្អ Benzema ទាត់ប៉េណាលទីមិនចូល ធ្វើឲ្យលទ្ធផលផលចុងក្រោយបញ្ចប់ត្រឹម ១-១។លទ្ធផលនេះបានធ្វើឲ្យ Osasuna ជាក្រុមបញ្ចប់ការឈ្នះ១០០%ក្នុងលីគរបស់ Madrid។ ក្រុមលោក Carlo Ancelotti ពេលនេះកំពុងស្ថិតនៅលេខពីរក្នុងតារាងពិន្ទុ La Liga មាន១៩ពិន្ទុស្មើគ្នាជាមួយក្រុមកំពូលតារាង Barcelona តែចាញ់គ្រាប់ចំណេញ៕ ...

លីគ២ ៖ ប្រកួតដំបូងនៅកីឡដ្ឋាន AIA KMH Park មានអ្នកគាំទ្រចូលទស្សនា ៣,២៩៧នាក់

លីគ២ ៖ ប្រកួតដំបូងនៅកីឡដ្ឋាន AIA KMH Park មានអ្នកគាំទ្រចូលទស្សនា ៣,២៩៧នាក់

ប្រកួតដំបូងនៅកីឡដ្ឋាន AIA KMH Park ទឹកដីរបស់ក្លិបបាល់ទាត់ ISI ដង្កោសែនជ័យ ទស្សនិកជនចូលទស្សនាផ្ទាល់នៅកីឡដ្ឋានរហូតដល់ ៣,២៩៧នាក់ បំបែកកំណត់ត្រាអ្នកចូលទស្សនាផ្ទាល់ច្រើនជាងគេនៅលីគ២ គិតត្រឹមសប្តាហ៍ទី១៨ កាលថ្ងៃអាទិត្យ ទី២ ខែតុលា ឆ្នាំ២០២២។ ជាលទ្ធផលឃើញថាក្លិបបាល់ទាត់ ISI ដង្កោសែនជ័យ បានយកឈ្នះ សាលាបាល់ទាត់ជាតិ ៤-១ បន្តឈរលេងរៀងទី៣ នៅលីគលំដាប់ទី២ ក្រោយឆ្លងកាត់១៨ប្រកួត ឈ្នះ១២ ស្មើ៣ និងចាញ់៣ មាន៣៩ពិន្ទុ ស្មើគ្នាជាមួយ កោះកុងអេហ្វស៊ី និង នគរបាលជាតិ។ ខណ:យុវជនបាទី ស្ថិតនៅលេខរៀងទី៨ ពីការលេង១៧ប្រកួតប៉ុណ្ណោះ ឈ្នះ៦ ស្មើ១ និងចាញ់១០ប្រកួត មាន១៩ពិន្ទុ ចំណែកក្រុមកំពូលតារាងនៅតែ អគ្គិសនីកម្ពុជា ដដែលក្រោយឈ្នះ ព្រៃវែង ក្នុងលទ្ធផល ២-០។ ខាងក្រោមនេះលទ្ធផលសប្តាហ៍ទី១៨៖– ព្រៃវែង ០-២ អគ្គិសនីកម្ពុជា– អាស៊ីអឺរ៉ុបយូណាយធីត ៣-៧ កោះកុងអេហ្វស៊ី– សូលទីឡូអង្គរ ១១-០ ណិចស្តិបអេហ្វស៊ី– ISI ដង្កោរសែនជ័យ ៤-១ យុវជនបាទី– នគរបាលជាតិ ២-០ ខេត្តត្បូងឃ្មុំ– សៀមរាបអេហ្វស៊ី ៣-១ បន្ទាយមានជ័យអេហ្វស៊ី។ តារាងចំណាត់ថ្នាក់គិតត្រឹមសប្តាហ៍ទី១៨៖ ...

ណាហ្គា ទទួលគិរីវង់ មានអ្នកគាំទ្រចូលទស្សនាផ្ទាល់ ច្រើនជាងគេប្រចាំសប្តាហ៍ទី១៨ នៅកីឡដ្ឋានកំពង់ស្ពឺ

ពានរង្វាន់ជម្រើសជើងឯកខេមបូឌានព្រីមៀរលីគ Cambodia Premier League ឆ្នាំ២០២២ មានចំនួនអ្នកចូលរួមទស្សនាការប្រកួតទាំងអស់ក្នុងសប្តាហ៍ទី១៨ សរុប៥,៥៨០នាក់ កាលពីថ្ងៃទី០១ ខែតុលា ទាំង៤កីឡដ្ឋាន។ ចំណែកទស្សនិកជន២ពាន់នាក់គត់ ចូលទស្សនាផ្ទាល់នៅកីឡដ្ឋានខេត្តកំពង់ស្ពឺ នៅក្នុងជំនួបដែលក្លិបបាល់ទាត់ណាហ្គាវើលដ៍ បានយកឈ្នះ គិរីវង់សុខសែនជ័យ ក្នុងលទ្ធផល ២-០ មានអ្នកចូលរួមទស្សនាផ្ទាល់ច្រើនជាងគេគិតត្រឹមសប្តាហ៍ទី១៧នេះ។ ខណ:៣គូផ្សេងទៀតមានទស្សនិជនចូលរួមដូចជា៖– ភ្នំពេញក្រោន ២-២ វិសាខា នៅកីឡដ្ឋាន Smart RSN មានទស្សនិកជន១,៩៣៥នាក់– Tiffy Army ០-១ ព្រះខ័នរាជស្វាយរៀង នៅកីឡដ្ឋានស្តាតចាស់ មានទស្សនិកជន ៨៦៧នាក់– បឹងកេត ១-២ អង្គរថាយហ្គឺរ នៅកីឡដ្ឋាន Cambodia Airway មានទស្សនិកជន ៧៧៨នាក់។ គួរដឹងថាកីឡដ្ឋានខេត្តកំពង់ស្ពឺសាងសង់ក្នុងទឹកប្រាក់ប្រមាណជា ៣,៥លានដុល្លារអាមេរិកនេះ នឹងក្លាយជាទីលានគោលសម្រាប់ក្រុមបាល់ទាត់ណាហ្គាវើលដ៏អ្វេសស៊ី ដោយក្រុមបាល់ទាត់អាជីពនេះ នឹងយកទីលានកីឡដ្ឋានខេត្តកំពង់ស្ពឺ សម្រាប់ការហ្វឹកហាត់ និងទទួលជាម្ចាស់ផ្ទះក្នុងជំនួបជាមួយក្រុមបាល់ទាត់នានា។ លើសពីនេះផងដែរក្រុមបាល់ទាត់នេះ នឹងជួយហ្វឹកហាត់ដល់ថ្នាលកីឡាករ កីឡាការីនីបាល់ទាត់ខេត្តកំពង់ស្ពឺ ដោយគ្រូបង្វឹកជំនាញ នឹងផ្លាស់ប្ដូរបទពិសោធន៍ជាមួយកីឡាករអាជីពផងដែរ។ កីឡដ្ឋាននេះនឹងក្លាយជាទីតាំងបណ្ដុះបណ្ដាលថ្នាលកីឡាករ កីឡាការីនីក្នុងខេត្តកំពង់ស្ពឺឱ្យកាន់តែមានសក្ដានុពល និងដើម្បីឱ្យប្អូនៗកីឡាករ កីឡាការីនីក្នុងខេត្តកំពង់ស្ពឺអាចបំពេញក្ដីស្រម៉ៃរបស់ខ្លួន៕ ...

ធ្វើដំណើរទៅប្រទេសកាតា ដើម្បីចូលរួមព្រឹត្តិការណ៍ World Cup គឺតម្រូវធ្វើតេស្តកូវីដ-១៩ និងពាក់ម៉ាស់ដាច់ខាត

អ្នករៀបចំព្រឹត្តិការណ៍បានថ្លែងនៅក្នុងសេចក្តីថ្លែងការណ៍មួយកាលពីថ្ងៃសុក្រ ទី៣០ កញ្ញាថា អ្នកគាំទ្រដែលចូលរួមការប្រកួត World Cup នៅប្រទេសកាតាឆ្នាំនេះត្រូវតែបង្ហាញភស្តុតាងនៃការធ្វើតេស្តរក COVID-19 អវិជ្ជមានដោយមិនគិតពីស្ថានភាពនៃការចាក់ថ្នាំរបស់ពួកគេនោះទេ។ អ្នកទស្សនាទាំងអស់ដែលមានអាយុចាប់ពី៦ឆ្នាំឡើងទៅត្រូវតែបង្ហាញលទ្ធផលអវិជ្ជមានពីការធ្វើតេស្ត PCR ដែលបានធ្វើឡើងក្នុងរយៈពេល៤៨ម៉ោង មុនពេលចេញដំណើររបស់ពួកគេ ឬពីការធ្វើតេស្តរហ័ស Rapid Testដែលបានធ្វើឡើងក្នុងរយៈពេល២៤ម៉ោងមុនពេលមកដល់។ លទ្ធផលនៃការធ្វើតេស្តអង់ទីហ្សែនរហ័ស (Rapid Test) នឹងត្រូវបានទទួលយកលុះត្រាតែពួកគេមកពីមណ្ឌលវេជ្ជសាស្រ្តផ្លូវការ ហើយមិនធ្វើតេស្តដោយខ្លួនឯងទេ។គ្មានការធ្វើតេស្តបន្ថែមទៀតនឹងត្រូវបានទាមទារនៅក្នុងប្រទេសកាតា ប្រសិនបើអ្នកទស្សនាមិនមានរោគសញ្ញា COVID-19។ អ្នកទស្សនាដែលមានអាយុចាប់ពី១៨ឆ្នាំឡើងទៅក៏នឹងត្រូវតម្រូវឱ្យទាញយកកម្មវិធីទូរស័ព្ទតាមដានទំនាក់ទំនងដែលគ្រប់គ្រងដោយរដ្ឋាភិបាលដែលមានឈ្មោះថា Ehteraz ។ អ្នកគាំទ្រនឹងត្រូវពាក់ម៉ាស់នៅលើការដឹកជញ្ជូនសាធារណៈ ប៉ុន្តែការចាក់វ៉ាក់សាំងមិនមែនជាកាតព្វកិច្ចសម្រាប់ការហូរចូលដែលមិនធ្លាប់មានពីមុនមកនៃអ្នកទស្សនា១.២លាននាក់ដែលរំពឹងទុកសម្រាប់ការប្រកួតនៅថ្ងៃទី២០ ខែវិច្ឆិកាដល់ថ្ងៃទី១៨ ខែធ្នូ៕ ...

ក្រុមជម្រើសជាតិអង់គ្លេសនារី នឹងប្រកួតមិត្តភាពអន្តរជាតិ ជាមួយជប៉ុន មុនបញ្ចប់ឆ្នាំ២០២២

ក្រុមបាល់ទាត់ជម្រើសជាតិអង់គ្លេសផ្នែកនារី ដែលម្ចាស់ពានរង្វាន់ជើងឯកអឺរ៉ុប នឹងប្រកួតលក្ខណៈមិត្តភាពអន្តរជាតិទល់នឹងជប៉ុន នៅប្រទេសអេស្ប៉ាញ កីឡដ្ឋាន Pinatar Arena នាខែវិច្ឆិកាខាងមុខ នៅថ្ងៃទី១១ ខែវិច្ឆិកា ឆ្នាំ២០២២។ គួរដឹងថាក្រុមរបស់លោកស្រី Sarina Wiegman បានក្លាយជាក្រុមនារីអង់គ្លេសដំបូងគេដែលឈ្នះពានរង្វាន់ធំមួយចាប់តាំងពីឆ្នាំ១៩៦៦បន្ទាប់ពីបានផ្តួលក្រុមអាល្លឺម៉ង់ក្នុងវគ្គផ្តាច់ព្រ័ត្រក្នុងលទ្ធផល ២-១ នៅកីឡដ្ឋាន Wembley។ ខណ:ក្រុមជម្រើសជាតិជប៉ុន ក្រៅពីប្រកួតមិត្តភាពទល់នឹងអង់គ្លេស ក៏មានការប្រកួត២លើកផ្សេងទៀតមុនបញ្ចប់ឆ្នាំ២០២២៖– ថ្ងៃទី៦ ខែតុលា ជប៉ុន ប៉ះ នីហ្សេរីយ៉ា មិត្តភាព– ថ្ងៃទី៩ ខែតុលា ជប៉ុន ប៉ះ នូវែលសេឡង់ MS&AD Cup។ មូលហេតុក្រុមទាំង២ប្រកួតមិត្តភាពអន្តរជាតិគឺដើម្បីត្រៀមលក្ខណៈសម្បត្តិ គ្រប់គ្រាន់សម្រាប់ការប្រកួត FIFA Women's World Cup 2023 នៅប្រទេសអូស្ត្រាលី និងនូវែលសេឡង់៕ ...

AFC Futsal៖លោក Caslos Cesar មិនអស់ចិត្តរឿង អាជ្ញាកណ្តាលកាត់សេចក្តី ក្រោយថៃស្មើម្ចាស់ផ្ទះគុយវ៉ែត

គ្រូជម្រើសជាតិថៃ លោក Caslos Cesar មិនពេញចិត្តការកាត់សេចក្តី របស់អាជ្ញាកណ្តាល ក្នុងជំនួបជាមួយកូវ៉ែត នៃពានរង្វាន់បាល់ទាត់ AFC Futsal Asian Cup2022 នាទីលាន Saad Al Abdullah Hall កាលពីថ្ងៃទី២៩ ខែកញ្ញា។ ខណ:ថៃ បានត្រឹមលទ្ធផលស្មើគុយវ៉ែត ២-២។ លោក Caslos Cesar បានថ្លែងក្រោយចប់ការប្រកួតដូច្នេះថា៖ «វាជាការ ប្រកួតរបស់ក្រុមមកពីអារ៉ាប់ ប៉ុន្តែខ្ញុំមិនយល់ថាហេតុអ្វីបានជាត្រូវយក អាជ្ញាកណ្តាលអារ៉ាប់ទាំងពីរឱ្យកាត់សេចក្តីនៅទីលាន។ ក្រុមទាំងពីរមានការប្រកួតដ៏ល្អដូចគ្នា កូវ៉ែតក៏ល្អ ដូច្នេះយើងល្អដូចគ្នា តែក្រុមរបស់យើងបែរជាកម្រិតឱ្យលេងបែបតឹងតែង ហើយយើងចាំបាច់ត្រូវលេងយ៉ាងប្រុងប្រយ័ត្នដោយសារតែការសម្រេចរបស់អាជ្ញាកណ្តាល»។ គ្រូបង្វឹកក្រុមបាល់ទាត់ជម្រើសជាតិថៃ លោក Cesar បានប្រតិកម្មចំពោះការកាត់សេចក្តីរបស់លោក Husain Al Bahhar ជនជាតិបារ៉ែន ដែលជាអាជ្ញាកណ្តាលនៅលើទីលាន ក្រោយមើលឃើញថា មានភាពលម្អៀងក្នុងការប្រកួតនេះ។ បញ្ចប់ការប្រកួតក្រុមទាំងពីរទទួលបានម្នាក់១ពិន្ទុ។ ចំណែកអ៊ីរ៉ាក់ យកបាន៣ពិន្ទុពីអូម៉ង់ បន្ទាប់ពីលត់៥-០ ក្នុងជុំទី២នេះ។ ខ្សែប្រយុទ្ធអ៊ីរ៉ាក់ Salim Faisal រកបាន៣គ្រាប់(៣,៣២,៣៥)ខ្សែការពារ Abdulhadi រកបាននៅនាទី៤ និងខ្សែបម្រើ Ghaith Riyadh ធ្វើបាននៅនាទី១៤។ បញ្ចប់ការប្រកួតពូល A គុយវ៉ែត ឈរលេខ១ មាន៤ពិន្ទុស្មើថៃ ឈរលេខ២ ចាញ់ផលសងគ្រាប់បាល់ លេខ៣ អ៊ីរ៉ាក់ មាន៣ពិន្ទុ និងអូម៉ង់ ឈរលេខ៤៕ ...

Conte បដិសេធរឿងត្រឡប់ទៅ Juventus វិញ ខណៈកំពុងរីករាយនៅ Spurs

Conte បដិសេធរឿងត្រឡប់ទៅ Juventus វិញ ខណៈកំពុងរីករាយនៅ Spurs

អ្នកចាត់ការ Antonio Conte បានត្រៀមរួចជាស្រេចចំពោះអនាគតដ៏វែងឆ្ងាយជាមួយ Spurs និងបដិសេធចំពោះគំនិតក្នុងការត្រឡប់ទៅកាន់ Juventus វិញ។កុងត្រានៅក្លិប Spurs របស់លោក Conte នឹងត្រូវអស់នៅបញ្ចប់រដូវកាលនេះ ខណៈមានព័ត៌មានលើកឡើងថា លោកនឹងត្រឡប់ទៅកាន់ក្លិបចាស់ Juventus ដែលជាកន្លែងលោកធ្លាប់ឈ្នះពាន Serie A ៣ដងក្នុងនាមជាអ្នកចាត់ការ។ លោកក៏បានបង្ហាញអារម្មណ៍មិនសប្បាយចិត្តចំពោះព័ត៌មានលេចឡើងថា លោកនឹងទៅដឹកនាំ Juventus ប្រសិនបើក្លិបបណ្ដេញលោក Max Allegri ចេញពីតំណែង។ Conte បានចាត់ទុកជាជាការមិនគោរចំពោះលោក និង Allegri។ បុរសសញ្ជាតិអ៊ីតាលីបានបញ្ជាក់ដែរថា លោកកំពុងរីករាយការងាររបស់ខ្លួននៅទីក្រុងឡុងដ៏ និងគ្មានបំណងចាកចេញឡើយ។“ពួកយើងទើបតែចាប់ផ្ដើមរដូវកាល ហើយពួកយើងមានពេលដ៏វែងឆ្ងាយក្នុងការរស់នៅជាមួយគ្នា យោគយល់គ្នា និងបន្តធ្វើការជាមួយគ្នា។ ពេលនេះខ្ញុំកំពុងផ្ដោតតែមួយមុខគត់លើការប្រកួតនៅចុងសប្ដាហ៍នេះជាមួយ Arsenal”។ សម្ដីលោក Conte។ លោក Conte បានមកដល់ Spurs កាលពីខែវិច្ឆិកាឆ្នាំមុន និងចុះកុងត្រាដល់ខែមិថុនា ឆ្នាំ២០២៣។ Spurs ក៏មានជម្រើសបន្ថែមកុងត្រាមួយឆ្នាំទៀតដែរជាមួយ Conte ប្រសិនបើភាគីទាំងពីរព្រមព្រៀងគ្នា៕ ...

ឪពុករបស់ Haaland ចង់ឲ្យកូនរបស់ខ្លួនលេងគ្រប់លីគកំពូលទាំង៥

ឪពុករបស់ Haaland ចង់ឲ្យកូនរបស់ខ្លួនលេងគ្រប់លីគកំពូលទាំង៥

ឪពុករបស់ខ្សែប្រយុទ្ធ Erling Haaland បានបង្ហើបថា លោកមិនចង់ឲ្យកូនរបស់ខ្លួនលេងនៅ Manchester City យូរពេកទេ ដោយចង់ឲ្យសាកល្បងទៅលេងនៅលីគផ្សេងៗឲ្យបានច្រើន។Haaland រកបាន១១គ្រាប់ក្នុងការបង្ហាញខ្លួន៧ប្រកួតដំបូងនៅ Premier League ឲ្យ City។ គេបានផ្ទេរមកអង់គ្លេសក្នុងរដូវក្ដៅនេះក្នុងតម្លៃខ្លួន៥១,៤លានផោន ក្រោយបង្ហាញសមត្ថភាពលេចធ្លោនៅ RB Salzburg និង Borussia Dortmund។ប៉ុន្តែលោក Alfie Haaland ដែលត្រូវជាឪពុករបស់ Haaland បានធ្វើឲ្យអ្នកគាំទ្រ City បារម្ភហើយ ក្រោយលោកមិនចង់ឲ្យកូនរបស់ខ្លួនលេងនៅអង់គ្លេសយូរឡើយ។ កីឡាករវ័យ២២ឆ្នាំបានចុះកុងត្រារយៈពេល៥ឆ្នាំជាមួយ City ប៉ុន្តែអាចនឹងមិននៅដល់ចប់កិច្ចសន្យានោះទេ។និយាយប្រាប់ The Times លោក Alfie ទម្លាយថា Haaland គួរតែចំណាយពេល២ឆ្នាំកន្លះនៅអាល្លឺម៉ង់ ២ឆ្នាំកន្លះនៅអង់គ្លេស និង២ឆ្នាំកន្លះនៅអេស្ប៉ាញ អ៊ីតាលីនិងបារាំង។ គេគួរតែសាកល្បងសមត្ថភាពនៅលីគធំៗផ្សេងទៀត៕ ...

FIFA Ranking៖កម្ពុជាធ្លាក់ទៅលេខរៀងទី១៧៧ ខណ:វៀតណាមនៅលេខ៩៦ ក្រោយចប់ថ្ងៃFIFA Day

FIFA Ranking៖កម្ពុជាធ្លាក់ទៅលេខរៀងទី១៧៧ ខណ:វៀតណាមនៅលេខ៩៦ ក្រោយចប់ថ្ងៃFIFA Day

ក្រុមកីឡាករបាល់ទាត់ជម្រើសជាតិកម្ពុជាឈរចំណាត់ថ្នាក់លេខ១៧៧ ក្នុងតារាងចំណាត់ថ្នាក់ពិភពលោក (FIFA Ranking) ប្រចាំខែកញ្ញា ឆ្នាំ២០២២ នេះបើយោងតាមការបញ្ជាក់របស់គេហទំព័រ FIFA.Com។ ពោលគឺថយចុះ៣ចំណាត់ថ្នាក់បើធៀបនឹងខែមុន ក្រោយបរាជ័យក្រុមជម្រើសជាតិបង់ក្លាដែស ក្នុងលទ្ធផល ១-០ ពានរង្វាន់មិត្តភាពអន្តរជាតិ នៅពហុកីឡដ្ឋានជាតិមរតកតេជោ ក្នុងថ្ងៃ FIFA Day។ បើធៀបនឹងប្រទេសនៅអាស៊ីអាគ្នេយ៍ កម្ពុជាស្ថិតនៅលេខ៨ ដោយឈរលើឡាវ ព្រុយណេ និងទីម័រខាងកើត។ចំណែកវៀតណាមឈរលេខ១នៅអាស៊ីអាគ្នេយ៍ ដោយស្ថិតនៅលេខ៩៦ ក្នុងតារាង FIFA Ranking រីឯ ថៃលេខ១១១, ហ្វីលីពីនស្ថិតនៅលេខ១៣៣, ម៉ាឡេស៊ីលេខ១៤៧, ឥណ្ឌូណេស៊ីលេខ១៥២, មីយ៉ាន់ម៉ាលេខ១៥៨, សិង្ហបុរីលេខ១៥៩៕ ...

កីឡាករ គួច សុកុម្ភៈ បង្ហាញពីចំណាប់អារម្មណ៍ចំពោះកីឡដ្ឋានខេត្តកំពង់ស្ពឺ ត្រៀមបើកទ្វារជាលើកដំបូងនៅលីគកំពូលកម្ពុជា